بیر ایلده، نه جور یوز کتاب اوخویاق؟
سیز ده سئویرسینیز، ایلده اوخودوغونوز کتابلارین لیستی اوزون اولسون؟ اولوبدور آلدیغینیز کتابی اوخومایاسینیز؟ بو عمل، ایلده چوخلو کتابلارین باشینا گلیر؟
سیز ده، ایستهدیگینیز قدر، کتاب اوخورمورسونوزسا، بیلین کی تک دئییلسینیز. کئچن ایل، اؤز شخصی صحیفه باش چکنده گؤدوم فقط بئش کتاب اوخوموشام. بو نتیجهدن چوخ اومیدسیز اولدوم. بونا گؤره، چاره یوللارین تاپماغا باشلادیم.
بیر ایلده نئجه یوز کتاب اوخویاق؟ اولابیلر، جاواب ده بو اولسون؛ بیسمارک دئمهلی، آخماقلار، تجربه ائدر اؤیرهنرلر، آنجاق من، آیریلارینین تجربهلریندن اؤیرهنیرم.
کتاب چوخ آلین
کتابا وئردییینیز پول، دئمک کتابی اوخوماغا هزینه ائتمکدیر. هر کس، اؤزو اوچون، بیر کتاب اوخوما زامانی آییرا بیلر. سیزین پولونوز یوخدورسا، آیری زادلاردان کسیب کتاب آلا بیلرسینیز.
هلندلی اراسموس بیر یئرده دئییب: پولوم آز اولاندا، کتاب آلارام، قالانی ایله ده یئمکله پالتار آلارام.
آرخایین اولون، کتابا واخت ایله پول قویماغین دهیری واردیر. من بوندان یاخشی سرمایه یاتیرتماق یولونو بیلمیرم. فقط، کتابی آلیب اوخومامادیغینیز زامان بو سرمایه باتاجاقدیر.
چوخ اوخوماق ایستهییرسینیزسه، چوخ کتاب اوخویون. بعضیلری چوخ راحات ایکی-اوچ میلیون، بیر جوت باشماغا پول وئریر، آما نظرلرینده بیر ایل ایچینده ایگیرمی کتاب آلماغا پول خرجلهمک آخماقلیقدیر.
بئله چوخ سادهدیر؛ ائوینیزده چوخ کتاب اولسا، سئچیب، اوخوماغا دا چوخ سئچهنهگینیز (گزینهییز) اولاجاقدیر.
اوخودوغونوز کتابلار اولابیلر بیر-بیری ایله فرقلی اولسون، آنجاق یاخجی اولار، اوخودوغونوز کتابین موضوعسوندا او بیری کتابلاری دا اوخویاسینیز.
همیشه کتاب اوخوماقدا اولون
دیوید ممت-ین «گلن گری، گلن گراس» نمایشنامهسینی اوخوساز، اوراداکی ساتیجی دئییر: «همیشه باغلیدیر». بو شعار، ساتیجیلارلا ایش یارادانلارین ایشینه گلر. من ده فرقلی بیر شعار ایله یاشاییرام: «همیشه (کتاب) اوخو».
ایندی، هفته ایچی گونده بیر ساعات کتاب اوخویورام و هفته سونلاری ایله تعطللرده بوندان داها چوخ.
اؤز حیاتینیزین شرایطینه گؤره اؤزونوز یاخجی یوللار تاپا بیلرسینیز و اون دا، یورقونلوق، واختین اولمامازلیغی و.. ده بئینینیزدن سیلینر.
همیشه کتاب اوخوماق بو آنلامدادیر:
قاطار ایله مئترودا.
کؤرپهنیزه سوت وئردییینیزده.
یئمک یئینده.
دوکتورلارین مطبلرینده.
ایش یئرینیزده.
هر نهدن مهم، یاخینلارینیز یوز اوتوزونجو دفعه اینستاگرام و تلگرام صحیفهلرینی یُوخلایاندا (چک ائدنده)، اخبارا باخاندا، سیز کتاب اوخویون.
بو یوللا، بیر ایل ایچینده، یوز کتاب اوخویا بیلرسینیز. چوخ آدام، بیر ساعاتین ایچینده، بیر معمولی کتابدان اللی صحیفه اوخویا بیلر، بس، سیز ده، بیر هفتهده اون ساعات کتاب اوخوسانیز، ایلده ایگیرمی آلتی مین صحیفه اوخویا بیلرسینیز و هر کتابی، ایکییوز اللی صحیفه گؤزه آلساق، تقریباً یوز دؤرد کتاب بیر ایلده اوخویا بیلرسینیز.
بیر ایلین ایچینده، ایکی هفته ده قاباغینیزا ایش چیخسا، یوز کتابی اوخویوبسونوز.
بو دا، کتابا خرجلهدییینیز سرمایهنین قاییتماسیدیر.
علاقهنیز اولان موضوعلارا گیریشین
گومان، سیز ده گؤروبسونوز، بعضی کتابلارین چوخ تعریف ائیبلر، آما سیز او کتابا باخاندا خوشونوزا گلمهییب! من، شخصاً آیریلارینین خوشونا گلن کتابلارا ساری چوخ گئتمهرم.
بوتون کتابلار، بوتون اینسانلارا چکیجی (جذاب) دئییللر. اولابیلر، بیر کتاب چوخ ساتیلان کتاب اولسون، آما سیزی اؤزونه ساری چکمهسین و اولابیلر، او کتابی اوخوماق حال-هاواسیندا دئییلسینیز.
بس علاقهنیز اولان کتابلاری آلیب اوخویون.
بیر زاماندا، مختلف کتابلارا برنامه تؤکون
کتاب اوخوماغا هئچ بیر قانون یوخدور. بئش کتابی بئله (حتی) بیردن اوخویا بیلرسینیز. سحرچاغی، بیر کتابدان اللی صحیفه اوخویورام و گوناورتادان سونراسی آیری کتاب اوخویورام. مساله سیزین سئچمهنیزه قالیب. چتین بیر کتابی اوخودوغونوز زامان، یانیندا بیر ساده کتاب دا اوخویا بیلرسینیز. من اؤزوم، گئجه چاغلاری رومان اوخوماغی سئورم. هانسی کتابدان نوت گؤتورمک لازم اولسا او کتابی یاتان واخت اوخومارام.
اله گتیردییینیز بیلگیلری ساخلایین
کتاب اوخوماقدان اله گتیردییینیز بیلگیلردن فایدالانین و گوندهلیک یاشاییشینیزدا بو معلوماتی ایشلهدین. هانسی کتابی اوخودوزنو، دوشونون و گؤرون نه دئدی و نهلر اؤیرندینیز.
حسین واحدی
قایناق: هافینگتون پست / آوانگارد