بنزین گلن ایل باهالاشمایاجاق
آنایول خبر سایتی‌نین مهر خبر آژانسیندان آلدیغی خبره گؤره، اؤلکه‌نین ۱۴۰۳-جو ایلین بودجه قانونونون بیرلشدیرمه (تلفیق) کمیسیونونون سؤزچوسو رحیم زارع بو گون (دی آیینین ۲۵-ی) اسلامی شورا مجلسینده کئچیریلن مطبوعات کنفرانسیندا بیلدیریب: گئچن ایلین بودجه‌سی ایله مقایسه‌ده بودجه کسری و تورّم سویه‌سی آزالیب. انرژی داشیییجی‌لارینین، بنزینین و گازوئیلین قیمتی آرتمایا‌جاق و دولتین گلن ایل اوچون قانون لایحه‌سینه اساساً بیز بنزینین و اوبیری انرژی داشیییجی‌لارینین قیمتینی آرتیرمایاجاغیق.
او دئدی: بیرلشدیرمه کمیسیونونون مصوبه‌لری، اجرا اولماق اوچون، مجلسده تصویب ائدیلمه‌لی و قُوروما شوراسی (شورای نگهبان) طرفیندن تصدیق ائدیلمه‌لیدیر. بیرلشدیرمه کمیسیونو، دولت بودجه‌سی قایناقلاریندان ایش یاراتما بؤلومونه ۳۱ مین میلیارد تومن وئریلهجهیینی تصدیقله‌دی.
زارع آرتیردی: نفت و دولت آراسیندا مالیه مناسبت‌لری آیدینلاشدیریلدی و ملّی گلیشیم (توسعه) صاندیغینین نفت گلیرلرینده‌کی پایی دولتین بودجه قانون لایحه‌سینده تکلیف ائتدیگی یوزده قیرخدان یوزده قیرخ بئشه چوخالدی.