«قودونو گؤزلرکن»
«قودونو گؤزلرکن » کتابی «ساموئل بئکت »ین یازدیغی دونیاجا مشهور ادبی اثرلردن بیریدیر. بو نمایشنامه‌ده بو گون بشر اولادی‌نین نئجه آوارا قالدیغی آپ-آیدین گؤره بیلرسینیز. ایکی پرده‌ده یازیلمیش تایسیز تراژدی-کمدی بیر اثر.
بیز گؤزله‌ییریک. جانیمیز سیخیلیر. یوخ، دیللنمه، اؤلومه یاخین بیر دارخماداییق. بونو دانماق اولماز. هر نه بیر آندا یوخ اولور و بیز یئنه ده یالنیزیق. هئچلیک و بوشلوق آراسینداییق.
حکایه بئله‌دیر؛ ولادیمیر ایله ائستراقون هر ایکیسی حیاتلارینین سون گونلرینی یاشاییر و «قودو» آدلی شخصی گؤزله‌ییرلر. بو واختی کئچیرمک اوچون نه‌یی الدن وئردیک‌لرینی اؤیرنمک اوچون ایچلرینده درین بیر گزینتی‌یه چیخیرلار، بو آرادا یامان-یووزلارا بئله ال آتیرلار، بو دا دئییشمه‌لره ایله آتیشمالارین ندنی اولور.
2 پرده‌لی «قودونو گؤزلرکن» تراژدی-کمدی نمایشنامه سینده، بو ایکی اوبراز (ولادیمیر و ائستراقون) آراسیندا چوخلو دانیشیقلار گئدیر و آرا‌لاریندا کیمی‌سه گؤزله‌دیکلرینی بئله بیلمیریک. اونون حاقیندا و گلیش واختی حاقیندا هئچ بیر بیلگی یوخدور، یا دا حیاتلارینین آبسورد و معنا‌سیز وارلیغینین داوام ائتمه‌سینه سبب اودور.
پیئس (نمایشنامه) اوچ پرده‌ده یازیلسایدی (یازیچینین ایلک قراری) یئنه ده «قودو» آرایا چیخماز و هئچ نه باش وئرمز ایدی. باخمایا‌راق، بیرپارا تنقیدچی‌لرین فکرینجه، نمایشنامه بیرینجی پرده‌ده قصورسوز بیته بیلردی، آنجاق دئمک اولار، ایکینجی پرده، ان آزی، «بئکت»ین اثرینی داها دقتله اوخویان بیری اوچون بیرینجی پرده کیمی دئییل. اوبیری یانمدان، بوتون پیئس و «قوقو» و «دی‌دی» حکایه‌سی ولادیمیرین ایکینجی پرده‌نین اولینده جانسیخیجی‌لیقدان و بلکه ده خوشبخت‌لیکدن اوخودوغو شعرین داوامی‌دیر:
مطبخه بیر ایت گلدی، آشپاز بیر تیکه چؤرک اوغورلادی و اؤلدو، باشقا ایتلر ده گلیب اونون اوچون قبیر قازدیلار و اوبیری ایتلره درس اولسون دئیه اونون مزار داشینا عینی حکایه‌نی یازدیلار.
بئکتین بو اثرینی تورکجه‌میزه، اینگیلیسجه‌دن ترجمه ائدن، خانیم «سعیده حسن‌پور همراهلو»دور. بو اثر بو ایل (1402) و «پارلاق قلم» یایین‌ائوی (انتشاراتی) آراجیلیغی ایله ایشیق اوزو گؤروبدور.
دئمه‌لیییک، «ساموئل بئکت» ایرلندلی یازیچی، شاعر و اویون‌یازیچیسی (نمایشنامه‌نویس)، ۱۳ آوریل ۱۹۰۶ تاریخینده دونیایا گؤز آچیب. ۸۳ ایل عمر ائله‌ییب و ۲۲ دسامبر ۱۹۸۹ میلادی تاریخینده دونیادان کؤچوبدور.