آچین پنجره لری؛ نوروز گلیر، یاز گلیر!
یوردوموزا نووروز گلیر، یاز گلیر. قارانقوشلارین قانادیندا، یاواش-یاواش قیش یوخوسوندان اویانان تورپاغین رایحهسینده، آغاجلارین، چیچکلرین تومورجوغوندا (جوانهسینده) گلیر ائلیمیزین نووروزو، یوردوموزون یازی. نووروز «تازا ایل” دئمکدیر، یازین ایلک گونودور. اصل یئنی ایل ده بو گوندن باشلانیر. یئنیگونون گلیشی ایله ائولره، عایلهلره یئنی نفس، یئنی بیر سئوینج گتیریر. هامی چالیشیر، بو بایرامی گؤزلجه، اورک سئوینجی ایله قارشیلاسین. هر ائوده، هر عایلهده یئنیگون بایرامینا اؤنجهدن حاضرلیق گئدیر. آنالار، باجیلار گؤی گؤیردیر، یومورتا بویاییر، سوجوق و باشقا نعمتلر بیشیریر، بوللوق و برکت رمزی اولان سمنی قویورلار. ائل تونقال باشینا ییغیشیر، کوسولولر باریشیر، قوهوملار، یولدشلار بیر-بیرینین ائوینه تبریکه گئدیرلر. گنج قیزلار، اوغلانلار اود یاندیریر، تونقال اوستوندن آتیلیر، قاپیلارا بیللی-بیللییا گئدیرلر، شال ساللاماغا چیخیرلار. کوچهده ده، قاتاردا دا، مدرسهده ده، ایدارهده ده هامینین دیلینده بیر سؤزلر سسلنیر: «بایرامینیز موبارک!».
ایل بایرامی، حلاللیق، تمیزلیک بایرامیدیر. نووروزا بیر آی قالمیش آداملار دؤرد چرشنبه آخشامینی بایرام ائدیرلر. بو چرشنبهلرین هر بیری اینسانلارین یاشاماسی، بوتون حیاتین وارلیغی اوچون واجب اولان دؤرد عنصردن بیرینه، سویا، اودا، یئله، تورپاغا حصر ائدیلیر. بو دا بو بایرامین، دونیانین ان اَسکی، اَن گؤزل بایراملاریندان بیری اولدوغونو گؤستریر. نووروز شنلیکلری آراسیندا ایلین آخیر چرشنبهسی چوخ طنطنه ایله قید اولونور. بایرام زامانی محلهلرده، خصوصاً ده کند یئرلرینده اوشاقلار و جاوانلار قاپی-قاپی گزیب بایرام پایی توپلاییر، مختلف اویونلار کئچیریرلر. نووروزون بیر بزهیی ده کوسا و کئچلدیر. اونلار اؤز اویونلاری ایله اوشاقلارا سئوینج گتیریر، اونلاری شادلاندیریر.
بو بایرامدا دونیادان کؤچنلر ده یاد اولونور، سون ایللرده ایسه وطن اوغروندا جانینی فدا ائدنلرین اویودوغو شهیدلر مزارینا (اورمیهده باغ رضواندا) اینسان آخینینین آیاغی کسیلمیر. عزیز گونلرده هئچ کس اونلاری یاد ائتمهیی اونوتمور. نووروز ائلیمیزین حیاتا گؤزل باخیشینین، طبیعتین و اینسانلیغین غلبهسینه اینامینین بایرامیدیر.
ایل بایرامی، عصرلرین درینلیییندن گلیب بیزیم گونلره چیخمیش ان شن و گؤزل بایراملاردان بیریدیر. نووروزا ارگنهگون، یئنگیگون، یاز بایرامی، ایل بایرامی و س. ده دئییلمیشدیر. نووروزا گؤره، بیرونی ابو ریحانین «آثار الباقی»، محمود کاشغارلینین «دیوان لغات تورک»، بالاساقونلو یوسف خاص حاجبین «قوتادقو بیلیک»، عمر خیامین «نووروزنامه»، نظام الملکون «سیاستنامه»، نظامی گنجوینین «اسکندرنامه» و ب. اثرلرینده بیر چوخ بیلگییه توش گلیریک.
بوتؤولوکده بو بایرام تکجه اورتادوغودان یاشایانلارین بایرامی دئییل، عمومیلیکده بشریتین معنوی دَیَری ساییلیر. کؤکلری ایسلامدان اؤنجهکی تاریخی دؤوره گئدیب چیخان یئنیگون بایرامی شرقین بیر چوخ اؤلکهلرینده کئچیریلیر. بو گؤزل طبیعت بایرامی، بوتون اینسانلارا موبارک اولسون، خصوصیله باریشسئور، اینسانلیغیسئور، طبیعتیسئور اینسانلارا.
آی ائللر، یوردوموزا نووروز گلیر، یاز گلیر، بوللوق-برکت گلیر. ائلیمیزین تازا گونو، یوردوموزون یازی خوش گلیر!
آچین پنجرهلری، نووروز گلیر، یاز گلیر، تر-تمیز بیر هاوا گلسین ائولریمیزه…