بیر گونش حکایه‌سی
گون او گون ایدی. صبیرلرین داشدیغی گون… اومیدلرین تؤکندییی گون… دونیا گونشین یولونو گؤزله‌ییردی. ظلمت‌دن چیخماق ایسته‌ییردی. ظلمت‌له چارپیشماقدان یورولموشدو. گونش دوغا‌جاق و بوتون دونیانی ایشیغا بورویه‌جکدی …
و بیر صاباح گونش دوغدو. ظلمتین سارای‌لاری باشینا چؤکدو. آددیم-آددیم دونیانین گؤزدن اوزاق یئرلرینه چکیلمه‌‌یه باشلادی. اونونلا گلن نه واردیسه، ائله اونونلا دا گئتدی. تکجه اوردا- بوردا قالان کؤلگه‌‌لردن باشقا…
گونش نورونو یایدیقجا یاییردی. کؤلگهلر ایسه قورخوردو. کؤلگهلر بیر گون گونشین اونلاری دا یوخ ائده‌جه‌ییندن قورخوردولار. ائله بو قورخو ایله ده گونشه لکه یاخماغا باشلاديلار. آنجاق گونش لکه گؤتورموردو. اونلار، گونشین لکه گؤتورمزلیگینی بیلمه‌ییردیلر…
گونش قالخدیقجا کؤلگهلر اریمه‌‌یه باشلاییردی. بیر- بیر اریییب یوخ اولدولاقلاریندان، چوخ کئچمه‌دی. آنجاق گونش نورونو یایدیقجا یاییر، گئت- گئده ظلمتین سیغیندیغی یئرلره قدر اوزانیردی…
گونش اوزاقلاشدیقجا کؤلگهلر باش قالدیریردی. سونرا کؤلگهلر بؤیومه‌‌یه باشلادی. و بؤیویه- بؤیویه هر بیری اؤز یئرینی آلدی. سئوینیرديلر. نئجه اولسا، خلاص اولموشدولار. نئجه اولسا، بیر آزدان ظلمت ده گله‌جکدی. چونکی گونش اوزاقلاشدیقجا اوزاق‌لاشیردی. بئله گئتسه، داغلارین آرخاسیندا گؤرونمز اولا‌جاقدی…
آنجاق اولان اولموشدو. گونش داغلارین آرخاسینا چکیلدیکجه ظلمت ده چؤکمه‌یه باشلامیشدی. بیر آزدان کؤلگهلر ده ظلمته قاریشیب ایتدی. آرتیق آرزولارینا چاتمیشديلار. آرتیق قورخویا دا یئر یوخ ایدی. آنجاق اونلار بیلمیرديلر. گونش یئنه دوغا‌جاق، گونش یئنه ظلمتین باغرینی سؤکه‌جه‌یی، بیلمه‌ییردیلر! بو مبارزه ابدیته قدر داوام ائده‌‌جه‌یی، بیلمه‌ییردیلر. ظلمت هئچ واخت اؤزونه یئر تاپا بیلمهیهجک. هارا گئتسه گونشی قارشیسیندا گؤره‌‌جک. آرزولاری اؤلدورمک ایستهیهجک، باجارمایا‌جاق. اومید‌لری اؤلدورمک ایستهیهجک، باجارمایا‌جاق. هارا گئتسه یاشام بویو الی بوش قاییدا‌جاق. ایسته‌‌سه ده، ایستمه‌‌سه ده مغلوبیتدن یاخا قورتارا بیلمهیهجک…
یازار: آیدین اوجال
کؤچورن: حسین واحدی
- 1 آددیم-آددیم اورمیهنین محللهلری 5 ماه پیش
- 2 موراکامی، آجی چکمیش واومیدلی بیر یازیچی 6 ماه پیش
- 3 آچین پنجره لری؛ نوروز گلیر، یاز گلیر! 9 ماه پیش
- 4 «قودونو گؤزلرکن» 9 ماه پیش
- 5 فلسفه چهارشنبههای آخر زمستان در فرهنگ آذربایجان 9 ماه پیش
- نظراتی که حاوی حرف های رکیک و افترا باشد به هیچ عنوان پذیرفته نمیشوند
- حتما با کیبورد فارسی اقدام به ارسال دیدگاه کنید فینگلیش به هیچ هنوان پذیرفته نمیشوند
- ادب و احترام را در برخورد با دیگران رعایت فرمایید.