گؤبهلکلر ایله چینار
یاغیش یاغماق اوزره‌یدی. قارا بولودلار های-کوی سالمیشدیلار. ایلدیریم، ایلدیریم دالیجا شاخیردی.
بیرآزدان یاغیش یاغمایا باشلادی. آغاجلارین چیچه‌یی چارتلادی. چوخ چکمه‌دی هر یئر ایسلاندی.
چکیرگه‌لر، ایلبیزلر و اوبیری بالاجا بؤجک‌لر، اوت‌لارین – یارپاقلارینین آلتینا سیغینمیشدیرلار.
بولودلار کؤینک‌لرین سیخیب قورتولاندان سونرا، دوم- دورو ماوی گؤی اورمانا گولومسه‌دی. گونش ایسه بولودلارین کؤچمه‌سیندن سونرا کئیفی سازالیب، گؤیون دورولوغوندا اؤزونه باخیب ساچلارینی داراماغا باشلادی.
بو آرادا قوجا چینارین دیبیندن ایکی گؤبه‌لک ایلدیریم‌لارین چاخماسیندان سونرا یئردن پیرتلامیشدیلار. چوخ سئوینیردیلر. باشلارینی بویان-اویانا چئویریب بؤیوک بیر یئرین صاحبی اولدوقلارینی ساندیلار.
ایکی گوندن سونرا بیر آز تؤره‌لیب، قول-قاناد آچیب یاخینلیق‌لاریندان کئچن کیچیک بؤجک‌لری دیسکیندیریب: «بورالارا دولانمایین بورا بیزیمدیر» - دئیه اونلاری قوووردورلار.
اوجا چینارلار ایسه بو بالاجا قوناقلارین ایشلرینه سس‌سیز-سمیرسیز باخیردیلار.
بیر ایکی گوندن سونرا، ایکیز گؤبهلکلر یاخینلیق‌لارینداکی چیناری دا اورادان قوومالارینی دوشوندولر. چینارا ساری اوز توتوب:
«هئی یئکه دوه! سن هانسی جهنمدن گلمیسن؟ بورادان تئز چیخ گئت، بورا بیزیم یورد-یووامیزدیر» دئییب چیناری تعجب‌لندیردیلر.
قوجا چینار گؤبلک‌لرین بو سؤزوندن هویوخوب، اونلارا:
«آی قونشولار نه اولوب سیزه، نه دئییرسیز؟» – دئدی.
سونرا داوام ائتدی: «دؤرد گون عؤمرونوزدن کئچیر، باشینیزا کؤلگه سالدیم، یئلدن قورودوم، یووا وئردیم سیزه، ایندی ایسه گمی‌ده اوتوروب گمی‌چی گؤزو چیخاریرسینیز؟».
گؤبلک‌لر اوجادان گولوب:
«سن نه دئییرسن قوجا، سن یوخ ایدین، بیز بورادایدیق! سن نه زامان گلیب‌سن، بیز گؤرمه‌دیک؟ صاباحا کیمی گئتمه‌سن اؤزوموز سنی قووالایاجاییق، آنجاق بیزدن دئمک» – دئییب، پیچیلداشدیلار.
چینار سوسدو.
بو دئییشمه‌نین صاباحی، گونش ساچلارینی اورمانا سرنده، بوتون جانلی‌لار آتیلیب دوشمه‌یه باشلامیشدیلار. قوجا چینار دریندن نفس چکیب بوداقلارینین قولونجونو سیندیراندان سونرا، آشاغی‌یا باخاراق، یئنی قونشولارینا سالام وئرمک ایسته‌یرکن، اونلاردان هئچ بیر ایز گؤرمه‌دی!
یازان: حسین واحدی
- 1 آددیم-آددیم اورمیهنین محللهلری 5 ماه پیش
- 2 موراکامی، آجی چکمیش واومیدلی بیر یازیچی 6 ماه پیش
- 3 آچین پنجره لری؛ نوروز گلیر، یاز گلیر! 9 ماه پیش
- 4 «قودونو گؤزلرکن» 9 ماه پیش
- 5 فلسفه چهارشنبههای آخر زمستان در فرهنگ آذربایجان 9 ماه پیش
- نظراتی که حاوی حرف های رکیک و افترا باشد به هیچ عنوان پذیرفته نمیشوند
- حتما با کیبورد فارسی اقدام به ارسال دیدگاه کنید فینگلیش به هیچ هنوان پذیرفته نمیشوند
- ادب و احترام را در برخورد با دیگران رعایت فرمایید.