قوروموش بیر آغاجین یانیندا، اونون گلمهیینی گؤزلهییردیم. هاوانین اورهیی دولموشدو. «بیلمیرم هاچان بو گؤزلمه بیتهجک» – اؤز-اؤزومه دوشونوردوم. بو یان-او یانا بورولماقدان یورولوب بیر یئرده دایاندیم. گؤزوم مندن بیر آز او یاندا دایانان کیشییه ساتاشدی. سانکی بیر شئیی آختاریردی، او دا منیم کیمی. بیر نئچه مدتدن سونرا یورولوب بیر بؤیوک داش اوزهرینده اوتوردو. آما یئنه ده آختارماقدان ال چکمهدی. گؤزلری دایما او یان بو یانی آختاریردی. اؤزومو ساخلایا بیلمهدیم:
– جناب نه آختاریرسیز؟
منه باخمادان، قهرلی و یورغون بیر سسله دئدی:
– اؤزومو!
سانکی بیرینین بو سوالی اوندان سوروشماسینی گؤزلهییردی.
تعجبله دئدی:
– نه یی؟
– دئدیم کی اؤزومو؟ ائشیتمهدین؟!
– اؤزونو ایتیرمیسن؟ بئله ده ایش اولار؟
– ندن اولماسین… من چوخداندی اؤزمو ایتیرمیشم.
– آدام اؤزونو ده ایتر؟
– ایتیرهر گؤزوده چیخار… دوز 28 ایلدی ایتیرمیشم.
– باش چیخارمیرام! نه جور اولار آخی؟
– نه جور اولاجاق؟ 28 ایل بوندان اؤنجه ایلک گون ایش تاپاندان سونرا ایتمیشم، ساعاتلار ایچینده، ثانیهلرده، دقیقهلرده، آسانسورلاردا، پیللهلرده، خیاوانلاردا… یولللاردا، گئجهلرده- گوندوزلرده، یاغیشلاردا قارلاردا، گونشلرده، بولودلاردا…دانلاقلاردا…
– بو نه جور ایتمکدیر؟
– ییرمی سککیز ایلدیر صبح ساعات آلتیدا یولا دوشوب ایش باشینا گئتمیشم، آخشام آلتیدا دا قاییتمیشام… بو ایکی ساعتی گؤرموشم فقط. ایندی بیلمیرم ساعاتیم یاتیب نه جور اولاجاق، منسه زامان ایچینده اؤزومو آختاریرام.
فیکره دالدیم! من ده سئوگیلیمی ایتیرندن اؤزومو ایتیرمیشم اولمایا؟!
حسین واحدی – یازیچی